ليش عم تعيفو ولادكن بالخطر؟ ابعتوهن عالمحرر يا خيو ليش لأ؟!

طالع بهالباص رجعان عالبيت أنا وابن عمي، قعدنا عالكراسي و قعدت قدامنا مرة أربعينية..لحظات و برن موبايلها وبيبدا الحوار:
- لك ابني وينك صرلك أسبوع موبايلك خارج التغطية
– والله يا أمي مافي شبكة
- شلونك أش اخبارك طمني عنك
– الحمدلله أنا بخير و ما ناقصني شي
- روح يا ابني الله يرضى عليك و يحميك مابدك تاخد إجازة قلبي نطف عشوفتك
– والله يا أمي صعب بتعرفي أنا عالجبهة و المعلم ما عبيعطي إجازات
- الله يرجعلي ياك سالم , بس ليش هيك صوتك متغير
– يا خالة بحب أقلك ابنك فطس……..

وهون الحجة بلشت بالبكة والصياح والنواح ..والموجودين بالباص حاولوا يهدوها شوي لبين ما وصلنا عأحد الحواجز.. وبيطلع العنصر اللي ما عرفان الله وين حيطه عالباص
بتبلش الحجة تقله اش صار معها وهو بقلها لا تخافي خالة لا تصدقي .. و نزلها من الباص منشان يروحوا يتأكدوا اذا في حدا مات عالجبهة اللي موجود فيها ابنها.

نكشني ابن عمي و قلي أش رأيك؟
رديت عليه: كل الحق عالحجة و جوزها ليش ليبعتوا ابنن عالجيش.. اي صرلنا أربع سنين بالثورة ما عبشوفوا اش عبصير بالشباب اللي عبروحوا عالجيش! كلها زل بزل والأحلا كل المجندين الأغرار بزتوهن عالجبهات!!
لسه الشعب لهلأ خايف و بقولوا لا يبو لأ مالنا أدن!!.. ولك بيستاهلوووو
قلي ابن عمي طيب وبلكي ما اهلو بعتوه؟! بلكي اجو اخدوه من بيتو أو سحبوه احتياط مالك شايف اش عبصير وشلون النظام فلتان عبيشحط هالشباب من الحارات ومعبي الدنيا حواجز!
قلتله ها يعني أهله ما بيعرفوا أنو ابنن بسن عسكرية..لك أقل شي يبعتوه عالمناطق المحررة أو يطالعوه عتركيا
لك خيو ليش ليعيفوه تحت الخطر! يطالعوه ويأمنوا عليه ليش لأ خيو؟!

أبوعبيد الحلبي – حلب نيوز